منتديات جروح البادية
السلام عليكم ورحمه الله وبركاته
مرحباً بك في منتدى جروح البادية
يسعدنا كثيرا انضمامك الينا و تشريفنا بحضورك الكريم يزداد تألقنا
نحن لازلنا فى البادية وتواجدك سوف يدعمنا

يمكنك تفعيل حسابك من خلال البريد الالكترونى المسجل به مع العلم
الادارة بعد تسجيلك بساعة واحده تقوم بتفعيل حسابك اذا واجهت مشكله

مع تحياتى ادارة المنتدى

منتديات جروح البادية


 
الرئيسيةالبوابةس .و .جالتسجيلدخول

إرسال موضوع جديد   إرسال مساهمة في موضوع
شاطر | 
 

 قصة واقعية لامرأة بالغربة

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
سيدة النور
نائبة المدير العام
نائبة المدير العام


....  اوسمة خاصه .... اوسمة خاصه : تاج الادارة
عـلم الــدولة اختر علم دولتك : ليبيا

اللقب الاظافى : زهرة الجبل

الجــــــــنس : انثى المساهـمـات : 492
الـنـقــــــاط : 1525
؛؛؛؛؛ تاريخ التسجيل ؛؛؛؛؛ : 07/11/2014
الـمــــــزاج : الحمدلله رائق

مُساهمةموضوع: قصة واقعية لامرأة بالغربة   04/01/17, 09:15 pm

منقواااال من قروب بموقع الفيس بوك 
وتأثرت كثيرا بصاحبة القصة .. 


حيث قالت الاتي:  



السلام عليكم ورحمة الله 

بنحكيلكم قصتي هي طويلة شوية بس نتمنى منكم تقروها وتاخدو منها عبرة..

انا انسانة  يتيمة اهلي توفو في حادث سيارة وتربيت انا وأختي الوحيدة في بيت خالي اللي ماقصرش معانا هو وزوجته وكان معتبرنا بناته ..تعلمنا احسن تعليم وتربينا احسن تربية لله الحمد ..وفي فترة دراستي تعرفت على شخص وعشنا قصة حب محترمة وجميلة تكللت بالزواج ..جبنا مع بعض تلاتة اطفال وكانت حياتنا كلها حب واحترام ومبسوطين لابعد الحدود ..

زوجي إنسان حنون طيب كريم أب مثالي بكل معنى الكلمة كان طموح يحب العلم ودايما يجتهد ويدرس وكل ما يتحصل على شهادة يسعى للي اعلى منها حتى وصل الى الدكتوراة في تخصصه وتحصل على ايفاد لتحضير الدكتوراة خارج ليبيا في دولة اجنبية ..وكان الموضوع صعب عليا في الاول وما تقبلتش فكرة البعد والغربة ..بس وافقت لانه هادي كانت أمنية حياته وما حبيتش نوقف في طريق طموحه وتوكلنا على ربي وودعنا الأهل وسافرنا ..وفعلا بدينا مرحلة جديدة وكنا عارفين انها حتكون صعبة بس زي ماهو قالي انه ما فيش حاجة صعبة طول ما احنا مع بعض وساندين بعض ... 

كانت البداية وخاصة السنة الاولى صعبة جدا لكن مع الوقت تأقلمت وحبيت المكان وحتى صغاري انسجمو فيه ..وبعد فترة رزقت بمولود رابع وعشنا مبسوطين ..

زوجي كان اغلب وقته في الجامعة وكان مجتهد جدا وناجح في دراسته ..وانا كنت كل وقتي بين الأطفال والبيت والشوبينق لما تنقصنا حاجة وكان زوجي يعوضنا عن غيابه في نهاية الاسبوع نطلعو ونغيرو في جو الصغار ..كانت حياتنا مستقرة رغم بعض الصعوبات المادية احيانا بس تحملنا ومشت الأمور ببركة الله سبحانه ...لم يستطع زوجي إكمال دراسته  بسبب اشكاليات مع الجامعة لانه ليبيا لم تدفع رسوم الدراسة (كانت ايام الثورة )..واضطر انه يبحث عن عمل وتأجيل الدراسة الى حين ربي يفرجها ع البلاد وتنحل المشاكل ..وتحصل على عمل في مكتب صديق عربي بس الدخل كان يدوب مكفينا وكنا حامدين ربي ومبسوطين..

بسبب الظروف المادية اضطرينا نغيرو السكن متاعنا لآخر أرخص وهنا بدأت مأساتي !!...

انتقلنا وفي السكن الجديد ماعندناش جيران ليبيين ..حسّيت بشوية وحدة بس حاولت نشغل نفسي بالصغار والبيت وحفظ القران وهكي مشيت الوقت ..

بعد فترة سكنو جنبي عايلة ليبية ..فرحت بيهم وطرت طيارة ..وقتلها انتي من اليوم اختي وفعلا كنا زي الوخيات ..

مشت الايام والشهور واحنا مبسوطين وانا كل شي عندي نقسمه مع جارتي وناكلو مع بعض وجونا اخر انسجام مع انه طبعي يختلف عليها انا هادية جدا ونحب الهدووووء وحتى أطفالي هادئين ويسمعو الكلام وهي كانت العكس هما من النوع اللي كل كلامهم بصوت عاااالي وحتى طريقتهم في الاكل مش منظمين احيانا ننزعج بس نمشي لاني كنت فرحانة بيهم ..!!كانت عندها مشاكل مع زوجها وكانت ديمة تشكيلي منه انه يعايرها بشكلها وتطييبها وحتى هو كان احيانا يشتكي لزوجي انها مهملة في بيتها ومهملة ليه وكان يهدد فيها انه بيتزوج عليها... 

طبعا كنا دايما انا وزوجي نهدو الجو بينهم ونصلحو فيهم ..المهم انا كنت دايما في صفها ونبعت في زوجي يعقل زوجها ..المرأة هادي كان فيها خصلة مش حلوة وهي انها تطلب هلبة يعني تقريبا كل شي تطلب فيها ووصلت حتى تطلب في الفلوس وحوايج صغاري وحوايجي كل شي كل شي ...مع انه وضعهم المادي احسن منا ..بس انا وقتها ما انتبهتش وكنت فرحانة بيها ونقول وخيات في الغربة وما لينا الا بعض ..

وصلت بيها تخش للمطبخ تاخد من الثلاجة اللي تبيه بدون حتى ما نشوف شني ..وكنت عااادي جدا المهم عندي صديقة مونستني !!..

بعد فترة زوجها مرض مرض صعب ولازم الفراش ومعاش اشتغل وأصبح وضعهم المادي صعب جدا جدا ..انا وزوجي ما قصرناش معاهم ومانقصهم شي طول فترة مرضه وحتى ايجار الشقة كان زوجي يدفعه ..واستمر المرض فترة طويلة وانا كنت ليها اخت واكتر وكذلك زوجي ..ولمدة اربع شهور كنت نطيب فطور وغداء وعشاء لينا وليهم وكنت نطيب لزوجها في اكل خاص ويوميا كنت انا نوصله ليهم  وما كانش الموضوع مضايقني على أساس ندير في عمل خير !!!واي خير ...!!..

في يوم جتني الصبح تبكي وحالتها حاااالة قتلها ان شاء الله خير شن في ؟؟..قالت انه قريبتها جت للمدينة متاعنا وعازمتها على زردة ومتفقين كل واحدة تجيب حاجة وع أساس هي ما عندهاش منين ..قتلها ولا يهمك انا نديرلك شن تبي ..فرحت وطلبت طاجين وشاورما !!..طبعا انا تحشمت قتلها حاضر وهي طلعت وانا بديت نفكر هادو يبو اللحم وتبي كمية كبيرة ..المهم خفت نطلب من زوجي يقولي مش لازمها وتنحرم من الطلعة بسببي ..تاني يوم وبعد تفكير طول الليل قررت نبيع خاتمي ونستر روحي معاها ..وفعلا تم كل شي ودرتلها اللي تبيه ..

بعد يومين فتحت الفيس على قروب لقيتهم منزلين صور لمة والدنيا تشكر ومن الصور كان طاجيني والشاورما زبطهم  على طول سبحان الله لما يبي يفضح عبده ..طبعا اللمة كانت لمة مغتربات  للتعارف وتقريبا لكل الليبيات في مدينتنا ولا قريبتها لا شي ..طبعا حزت في نفسي وبكيت ووجعني باه علاش ما قالتش راهو مشيت حتى انى علاش شن درتلها ...ومن هالكلام .

المهم فوته الموضوع والقصص اللي زي هادي عندها منهم هللللبة وكنت نفوتلها وخلاص ...

بعد فترة زوجها زادت حالته سوء وتوفى رحمة الله عليه..كانت ايام صعبة ووقتها سخفتني غربة وموت الزوج المهم نسيت كل فصولها ووقفت معاها اكتر من الأخت ..بعد ايام من الوفاة سألتها امتى بتروحي لليبيا وشن ناوية !!!..الصدمة انها قالت مش مروحة البلاد وضعها صعب ومش مناسب للمرواح قالت بتخدم وقالتلي أهو انتم جنبي ما تقصروش معاي عارفتكم  !!!!!!!.. باهي كيف بتعيش كيف يصير فيها من غير زوجها في الغربة !!..ما فهمتش ..وسايرتها وقلتلها مايهمك شي اللي بيا بيك وان شاء الله ما نقصرش معاك ..ومن هنا بدات الكارثة ..!!!

طبعاً مرت الايام وكنا نتقاسمو قوت يومنا ومع هي تاخد في الاعانة الاجتماعية مشت الأمور وتحملنا عبأ اكبر من قدرتنا طمعا في الأجر من الله سبحانه ...بس هي كانت من النوع اللي طلباته هللللبة وتطلب في حاجات تقدر تستغني عنها وصلت بها انها تطلب عشاء بالديليفري وتكلمني نخلص ..وغيره هلللبة ..طبعا بعد كذا موقف قررت نكلمها ونفهمها انه تنقص من الطلبات لانه الموضوع زاد عن الحد وفاق قدرتنا المادية وزوجي وصل يقصر علينا في سبيل هي يوصلها كل طلباتها ..اصبح الامر مزعج عندي واتخذت قرار انى نوقفها عند حدها وقلتلها على قد فراشك مد رجليك راهو تعبنا ولما تبي حاجة مهمة زي دواء او علاج او مصاريف مهمة زي الأساسيات اليومية تفضلي اما الأمور الزايدة اللي تقدري تستغني عنها واللي نحن أصلاً ناسيينها من زمان فأرجوك قدري وضعنا وحاولي تستغنى عليها ...طبعا اضايقت من موقفي وزعلت ومعاش اتصلت بيا ولا طلبت منى شي من يومها ...طبعاً استغربت جددداً لان مش من طبيعتها الزعل لما تبي حاجة !!...طبعاً استمر موضوع الشكوى من المصروف من قبل زوجي وكل ما نطلب حاجة ينوض يعيط ويشكي ويبكي ويتهمني بعدم المسؤولية والأنانية مع انى مش هكي أبداً بالعكس نقدر فيه ونقدر في التعب اللي يتعب فيه على خاطري انى وصغويرتنا ...مرت الايام والشهور وزوجي اصبح اكثر عصبية ومعاش متحمل منى شي وحتى مع الصغار اصبح مهمل ليهم ومعاش مهتم باي شي يخصهم ..قدرت وضعه لانه غربة وخدمة وضغط الحياة وقلت ربي يعينه وحاولت نتحاشاه لما يتعصب ...

المهم في مرة روح في الليل من الخدمة كان متنرفز وكاره الحوش وتسبل بعركة معاي وطلع يبات في الصالة ..قعدت طووول الليل نبكي وندعي ربي يرده ليا ولاولاده رداً جميلاً ...

بعدين هدأت وفي وسط هدوء الليل نسمع في زوجي يتكلم بصوت واطي ..طبعاً نااار ركبتني بعدين استعوذت من الشيطان وتوقعته يكلم في الأهل في ليبيا ...

تاني ليلة نفس القصة بات في الصالة ..ولما حس انه رقدنا سمعته يتكلم تاني في الفون وكان واضح يكلم في بنت..وهنا قلبي قريب وقف وحاجة ساخنة نزلت على راسي ..في حاجة غلط مكالمات زوجي فيهم اللي خفت منه واللي حاولت بشتى الطرق نبعده من راسي لكن صاير ..كانت اسود دقايق مرت في حياتي ..الصبر يارب الصبر ياربي دعيت ربي يساعدني كيف بنتحمل كيف بنكمل حياتي !!!...معاش قدرت نركز حتى شن يقول بس فهمت انه بنت ..زوجي وبعد هالعمر والتضحيات دار فيا هكي ...رجعت لفراشي وتغطيت وجسمي كله يرعش لا عارفة نبكي لا عارفة نعيط بأعلى صوتي لا قدرت نواجهه ..كان خليط من المشاعر البشششسعة وانهيار في عقلي وشلل في تفكيري مش طبيعي ..طلع الضي وانا بالحالة هدى عاجزة جسم ميت نفسيه مدمرة ...

تمالكت نفسي وتوضيت وصليت ركعتين عسى ان يلهمني ربي حسن التصرف ويعطيني الصبر في مصيبتي ...

طلع الصبح وبعت أطفالي لمدرستهم وكنت نتمالك في أعصابي قدّامه ولا اعرف ليش تظاهرت انى ما عرفت شي ..طلع لعمله ومرت عليا الساعات كأنها ايام وانا أتخبط كيف ندير ووين نمشي ولمن نحكي وكان المهدا ليا هو مصحفي والدعاء ...

بعد كذا يوم بنفس السيناريو هو ينام في الصالة على أساس زعلان وهو عذر لإجراء مكالماته واستمريت بالتمثيل انى لا اعرف شيء ربما حبيت نعرف لوين بيوصل ..لا اعرف ليش كنت مشوشة جداً وخايفة من المواجهة بشكل كبير ..!!

في ليلة من هالليالي السود كما اعتبرهم انا ..كالعادة تلقى الاتصال وبدا الضحك والكلام المبهم والراجل جوه اخر انسجام ..بعدين قال اوكى لكن شوية بس !!!..وبعدها لبس وطلع !!!!..انا ركبتني ناااار ناااار قعدت نفرفش بنطير ما عرفتش كيف نتصرف زوجي ياناس زوجي وبوي وخوي وحب حياتي بو صغاري شريك عمري ...ياربي شن اندير معاش عرفت وضاقت بيا الدنيا ومافيها ...

ومرت الليلة وفعلا ما تاخرش ..هديت نفسي وحاولت نرقد ...بعد يومين تكرر الموقف وناض لبس وبيطلع ..في اللحظة هدى أخذت قرار انى نعرف شن قاعد يصير لبست عبايتي وطلعت ورآه ..وياريت ما طلعت ياريت قعدت في جهلي ...زوجي طلع ومشي لحوش جارتي صديقتي اختي اللي وقفت معاها اكتر من الأخت ..كانت واقفة في الباب وبدون وشاح وقف عليها وأعطاها حاجة مش عارفة ليش حسيتها فلوس ..قعدو يهدرزو ويضحكو وكانت تتمايل بشكل ....!!!..مش محترم كان واضح في شي بينهم ..روحت نجري وخليتهم معاش قدرت نشوف معاش قدرت ...بكيت وبكيت وبكيت ..عرفت ليش هي معاش كلمتني عرفت ليش انقطعت عليا ..هي وصلت لزوجي ودبرت أمورها بطريقتها ...كانت طعنة منهم الاتنين ..قعدت طول الليل نفكر ونفكر وأخذت قرار بمواجهته لانه الموضوع هكي اكبر من قدرتي ع التحمل ..طلع الصبح ومشيتله نوضته وانى غارقة في دموعي ..ناض مخلوع شن في شن في ..قتله شفتك شفتك امس معاها شفتك وسمعتك ليالي وليالي سمعت خيانتك سمعت طعنك ليا ..سكت وناض من جنبي غير وطلع وهو ساكت ولا حرف ...مش عارفة ليش رجليا تجمدو وماقدرتش نتحرك ورآه ..كنت في حالة انهيار تاااام ..طلع وبعد شوية رجع للبيت ..جلس وقالي بنقولك كلمتين ...انى كنت منهارة بالبكاء ..قالي انى بنتزوجها على سنة الله ورسوله وانتي في بيتك وهي في بيتها وباذن الله  ما ينقص عليك شي ...طبعاً انا رفضت وطلبت الطلاق واصريت على الطلاق ...حاول معاي وقالي فكينا من الطلاق وانتي زوجتي وام صغاري ومن هالكلام اللي كله كدب في نظري ..قتله انت بدلتني وبدلت صغارك خلاص امشي في حالك وانا في حالي ..وفعلاً تم الطلاق وهو تزوج الجارة الصديقة اللي خانت العشرة وخانت الصحبة ..توكلت على نفسي واشتغلت في دي كير ومع الاعانة مشت امورنا وهو عايش مع الجارة يجي يشوف في صغاره مرة في الاسبوع ومرات يعطيهم مصروف ومرات لا ..

حياتي ادمرت وحياة صغاري ادمرت وخربت عيلة كانت سعيدة وعايشة بسلام والسبب امرأة اعتبرتها اخت وصديقة ..

انا الان أعيش من اجل أطفالي أكافح من اجلهم ومع انه طليقي حاول يردني وبعت ناس ودار جهده ..بس رفضت لانه طلع من قلبي ومن خاطري وكملت اليتم اللي بدات به حياتي والله سبحانه وكيلي وحسبي ولن ينساني ولن يتركني أبداً ..الحمد لله على كل شي ..نتمنى تاخدو عبرة والثقة شي غاااالي وثمين ما تعطوهاش لاي حد !!..


وهنا نهاية قصتها 


ربي يكون في عونها 
وحسبنا الله ونعم الوكيل في اللي خانوا العيش والملح ..


عدل سابقا من قبل سيدة النور في 05/01/17, 11:54 pm عدل 1 مرات (السبب : القصة كانت ناقصة)
الرجوع الى أعلى الصفحة اذهب الى الأسفل
http://almjal2007.talk4her.com/
شموع الحب
مشرفه بجروح البادية
مشرفه بجروح البادية


عـلم الــدولة اختر علم دولتك : ليبيا

اللقب الاظافى : شخصية هامة

الجــــــــنس : انثى المساهـمـات : 200
الـنـقــــــاط : 1158
؛؛؛؛؛ تاريخ التسجيل ؛؛؛؛؛ : 11/09/2014

مُساهمةموضوع: رد: قصة واقعية لامرأة بالغربة   05/01/17, 09:37 pm

سيدة النور 
تقريبنا القصه مش كامله 
سلمت على القصه 
الرجوع الى أعلى الصفحة اذهب الى الأسفل
سيدة النور
نائبة المدير العام
نائبة المدير العام


....  اوسمة خاصه .... اوسمة خاصه : تاج الادارة
عـلم الــدولة اختر علم دولتك : ليبيا

اللقب الاظافى : زهرة الجبل

الجــــــــنس : انثى المساهـمـات : 492
الـنـقــــــاط : 1525
؛؛؛؛؛ تاريخ التسجيل ؛؛؛؛؛ : 07/11/2014
الـمــــــزاج : الحمدلله رائق

مُساهمةموضوع: رد: قصة واقعية لامرأة بالغربة   05/01/17, 11:25 pm

شموع الحب


اسعدني مرورك.. وسرني اهتمامك وتعليقك


وبالفعل كانت ناقصة وتم تعديلها


عذرا .. فانا افتح واشارك معكم من خلال الهاتف النقال  Smile


لك ودي وتحياتي


عدل سابقا من قبل سيدة النور في 05/01/17, 11:56 pm عدل 1 مرات
الرجوع الى أعلى الصفحة اذهب الى الأسفل
http://almjal2007.talk4her.com/
ابن البادية
مدير عام الموقع
مدير عام الموقع


عـلم الــدولة اختر علم دولتك : ليبيا

اللقب الاظافى : عضو مؤسس

الجــــــــنس : ذكر المساهـمـات : 956
الـنـقــــــاط : 2539
؛؛؛؛؛ تاريخ التسجيل ؛؛؛؛؛ : 19/07/2014
الـمــــــزاج : رائق والحمد لله

مُساهمةموضوع: رد: قصة واقعية لامرأة بالغربة   05/01/17, 11:34 pm

قصه فيها عبره جميله

وهى الصبر وبالارتده يتحقق كل شى

نفسهما طويله وكافحوا كثيرا

شكرا لك على الانتقاء

تحياتى

الرجوع الى أعلى الصفحة اذهب الى الأسفل
سيدة النور
نائبة المدير العام
نائبة المدير العام


....  اوسمة خاصه .... اوسمة خاصه : تاج الادارة
عـلم الــدولة اختر علم دولتك : ليبيا

اللقب الاظافى : زهرة الجبل

الجــــــــنس : انثى المساهـمـات : 492
الـنـقــــــاط : 1525
؛؛؛؛؛ تاريخ التسجيل ؛؛؛؛؛ : 07/11/2014
الـمــــــزاج : الحمدلله رائق

مُساهمةموضوع: رد: قصة واقعية لامرأة بالغربة   06/01/17, 12:20 am

ابن البادية

مشكور لهذا المرور

ولكن القصة كانت ناقصة كما نبهتني الاخت شموع الحب

والان قمت بتعديلها ووضع باقي القصة

لك تحياتي
الرجوع الى أعلى الصفحة اذهب الى الأسفل
http://almjal2007.talk4her.com/
ابن البادية
مدير عام الموقع
مدير عام الموقع


عـلم الــدولة اختر علم دولتك : ليبيا

اللقب الاظافى : عضو مؤسس

الجــــــــنس : ذكر المساهـمـات : 956
الـنـقــــــاط : 2539
؛؛؛؛؛ تاريخ التسجيل ؛؛؛؛؛ : 19/07/2014
الـمــــــزاج : رائق والحمد لله

مُساهمةموضوع: رد: قصة واقعية لامرأة بالغربة   06/01/17, 10:54 am

شكرا على التنبيه

الان وضحت الصوره

قصه مؤثرة جدا ولاادرى على من اضع اللوم

الجارة والصديقه او الوةج او الزوجه

او حتى الظروف نفسها

شكرا على الاختيار

الرجوع الى أعلى الصفحة اذهب الى الأسفل
سيدة النور
نائبة المدير العام
نائبة المدير العام


....  اوسمة خاصه .... اوسمة خاصه : تاج الادارة
عـلم الــدولة اختر علم دولتك : ليبيا

اللقب الاظافى : زهرة الجبل

الجــــــــنس : انثى المساهـمـات : 492
الـنـقــــــاط : 1525
؛؛؛؛؛ تاريخ التسجيل ؛؛؛؛؛ : 07/11/2014
الـمــــــزاج : الحمدلله رائق

مُساهمةموضوع: رد: قصة واقعية لامرأة بالغربة   06/01/17, 01:03 pm

ابن البادية اسعدني مروك

ولا شكر على واجب

اما عني فاراى بان اللوم 

على الجارة والزوج اللذان لم يوصون العشرة والعيش والملح

وعلى الزوجة التي وثقت بالاثنين ثقة عمياء
الرجوع الى أعلى الصفحة اذهب الى الأسفل
http://almjal2007.talk4her.com/
 
قصة واقعية لامرأة بالغربة
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:تستطيع الرد على المواضيع في هذا المنتدى
منتديات جروح البادية :: ๑۩۞۩๑ { جروح البادية للقصص والمدونات } ๑۩۞۩Ů :: ۩ منتدى القصص والروايات والمنقولة-
إرسال موضوع جديد   إرسال مساهمة في موضوعانتقل الى: